کابل؛ د مالي او عوایدو مدیرانو ۱۵ ورځنی روزنیز ورکشاپ پای ته ورسېد
شنبه، ۳ جمادى الآخره ۱۴۴۸
د افغاني سرې میاشتې د مالي ریاست له لوري، د ناروې سره صلیب په مالي ملاتړ د بلخ، هرات، کندهار او کندز سیمه ییزو زونونو او اړوندو نمایندګیو ۳۰ تنو مالي او عوایدو مدیرانو ته د مالي محاسبې او مالي لارښود په اړه ۱۵ ورځنی روزنیز ورکشاپ پای ته ورسېد.
د ورکشاپ په اختتامیه مراسمو کې د افغاني سرې میاشتې مرستیال حافظ عزیز الرحمن د ادارې د موخو په ترلاسه کولو او د چارو په سم مدیریت کې د مالي برخې پر مهم رول ټینګار وکړ او ویې ویل، مالي برخه د هرې ادارې د ملا تیر بلل کېږي او د مالي چارو شفافیت او حساب ورکونه د ادارې د بریالي فعالیت لپاره مهم دي.
نوموړي له ګډونوالو وغوښتل چې له روزنې ترلاسه شوې پوهه او تجربې په خپلو ورځنیو چارو کې عملي کړي او خپلې دندې په دقت، صداقت او مسؤولیت ترسره کړي.
په دې ۱۵ ورځني ورکشاپ کې د مالي مدیریت د پیاوړتیا، حساب ورکونې او د مالي لارښود د اغېزمن تطبیق په اړه روزنه او معلومات وړاندې شول.
افغاني سره میاشت د خپلو مالي او اداري چارو د لا ښه مدیریت، شفافیت او حساب ورکونې د پیاوړتیا لپاره د کارکوونکو مسلکي ظرفیت لوړولو ته دوام ورکوي، څو مالي چارې په منظم او اغېزمن ډول پر مخ ولاړې شي.
