کابل؛ د ځوانانو او رضاکارانو د پالیسۍ د وروستي کولو دوه ورځنی ورکشاپ پیل شو
سې شنبه، ۱۱ ربیعالأول ۱۴۴۸
د افغاني سرې میاشتې د ځوانانو او رضاکارانو ریاست له لوري، د ډنمارک سره صلیب په مالي ملاتړ، د ځوانانو او رضاکارانو د پالیسۍ د بیاکتنې، لا غني کولو او وروستي کولو په موخه دوه ورځنی ورکشاپ پیل شو.
په ورکشاپ کې د ځوانانو او رضاکارانو ریاست د کارکوونکو ترڅنګ د سکرتر جنرال د پلان او پالیسۍ معاونیت، د اطلاعاتو او خپرونو، نړیوالو اړیکو، مرستونونو، روغتیايي خدمتونو او حقوقي چارو ریاستونو استازو ګډون کړی دی.
د ورکشاپ په پرانیسته کې د افغاني سرې میاشتې د سکرتر جنرال د عملیاتي چارو مرستیال، مولوي روح الله عبدالسلام وویل، چې د ځوانانو او رضاکارانو لپاره د یوې جامع او معیاري پالیسۍ جوړول به د هغوی د فعالیتونو په ښه تنظیم او د خدمتونو په اغېزمنه وړاندې کولو کې مهم رول ولري.
نوموړي ځوانان او رضاکاران د ملي ټولنې مهمه سرمایه وبلله او ویې ویل چې د رضاکارانه خدمتونو د معیاري کولو، د ساحوي اړتیاوو د پېژندلو او د فعالیتونو د ښه تنظیم لپاره د یوې روښانه او اغېزمنې پالیسۍ شتون اړین دی.
د ځوانانو او رضاکارانو ریاست رئیس، مولوي عارفالله منصور وویل چې د افغاني سرې میاشتې رضاکاران په لرې پرتو سیمو کې د پېښو له امله زیانمنو خلکو، راستنو شویو کډوالو او نورو اړمنو کورنیو ته د مرستو او خدمتونو په رسولو کې مهم رول لري.
هغه زیاته کړه چې د پالیسۍ د بیا کتنې پر مهال د رضاکارانو واقعي اړتیاوې، ساحوي تجربې او د افغاني ټولنې شرایط په پام کې نیول شوي، څو پالیسي د هېواد له ټولنیز او فرهنګي چاپېریال سره همغږې او په اغېزمنه توګه پلې شي.
د ډنمارک سره صلیب د مرکزي دفتر د ملي ټولنو د پراختیا کارپوه جېکوب، د پالیسۍ د بیا کتنې په برخه کې د افغاني سرې میاشتې د کارکوونکو هڅې وستایلې او ویې ویل چې د یوې جامع او اغېزمنې پالیسۍ د وروستي کولو لپاره د اړوندو ریاستونو او کارکوونکو نظرونه او تجربې مهمې دي.
نوموړي زیاته کړه چې د دوه ورځني ورکشاپ په ترڅ کې به ګډونوال د پالیسۍ بېلابېلې برخې وڅېړي او د خپلو تجربو او نظرونو پر بنسټ به د پالیسۍ د لا ښه والي لپاره وړاندیزونه شريک کړي، څو د رضاکارانو له اړتیاوو سره سمه او د پلي کېدو وړ پالیسي وروستۍ شي.
