پکتیا؛ د اقتصادي خونديتوب په اړه پنځه ورځنی روزنیز ورکشاپ پای ته ورسېد
شنبه، ۲۲ ربیع الأول ۱۴۴۸
د افغاني سرې میاشتې له لوري په پکتیا ولایت کې د سویل ختیځ زون د شپږو نمایندګیو ( پکتيا، پکتيکا، خوست، غزني، لوګر او ميدان وردګ) د حوادثو او سروې مدیرانو او رضاکارانو لپاره د اقتصادي خونديتوب په اړه پنځه ورځنی روزنیز ورکشاپ پای ته ورسېد.
دغه ورکشاپ د سره صلیب نړیوالې کمېټې په مالي ملاتړ جوړ شوی و چې ګډونوالو ته پکې د بشري خدمتونو پر مهال د اقتصادي خونديتوب پر اهمیت او اړوندو موضوعاتو روزنه ورکړل شوه.
په ورکشاپ کې ګډونوالو ته د زده کړل شوو موضوعاتو د عملي پلي کولو په اړه هم لازمې لارښوونې وشوې، څو وکولای شي د خپلو دندو پر مهال ترلاسه شوې زده کړې او مهارتونه په اغېزمنه توګه وکاروي.
د ورکشاپ موخه د حوادثو او سروې مدیرانو او رضاکارانو ظرفیت لوړول او د اقتصادي خونديتوب په برخه کې د هغوی د پوهې او مسلکي مهارتونو پیاوړتیا وه.
د یاد ورکشاپ په پای کې ګډونوالو ته تصدیق پاڼې هم ووېشل شوې.
