ميدان وردګ ولایت کې د افغاني سرې میاشتې ټولنې له لوري ۳۳۲کورنیو ته مرسته ووېشل شوه!
نن یکشنبه د روان ۱۴۰۰ لمریز کال د کب پر ۱۵مه نېټه د افغاني سرې میاشتې ټولنې له لوري د ميدان وردګ ولایت بهسود ولسوالۍ لومړۍ حصه کې ۳۳۲ بېوزلو او اړمنو کورنیو ته د خوراکي توکو مرسته د افغانې سرې مياشتې د مرکزي سويل لويديځ زون د ریيس مولوي الياس خېل "ناصري" په شتون کې ووېشل شوه.
یاده مرسته، چې د ترکیې هېواد د سرې میاشتې له لوري چمتو شوې وه په کې هرې کورنۍ ته اته قلمه خوراکي توکي وویشل شول، چې په کې ۱۰ کيلو وريژې، ۵ ليتره غوړي، ۵ کيلو لوبيا، دوه کيلو مکروني، ۲ کيلو بوره، نيم کيلو شين چای، يو قطۍ روب او نيم کيلو بسکټ شامل وو.
