هرات؛ د حرفوي زده کړو استادانو او زده کوونکو ته ۳۹۵ زره افغانۍ ووېشل شوې
چهارشنبه، ۱۵ المحرم ۱۴۴۸
د افغاني سرې میاشتې له لوري د هرات ولایت په شینډنډ او زنده جان ولسوالیو کې د اقلیمي بدلون پروژې تر چتر لاندې د حرفوي زده کړو د مرکزونو ۴ ښځینه استادانو او ۵۰ تنو زده کوونکو ته ۳۹۵ زره افغانۍ ووېشل شوې.
په دې مرسته کې د استادانو معاشونه او د زده کوونکو د ترانسپورټ لګښتونه شامل وو، څو د حرفوي زده کړو بهیر په منظم ډول دوام ومومي.
ټاکل شوې ده، چې یاد زده کوونکي به د شپږ میاشتنیو حرفوي زده کړو له بشپړولو وروسته د خیاطۍ په برخه کې د ترلاسه شویو مهارتونو پر مټ د کار او عاید زمینه برابره او د خپلو کورنیو د معیشت په ښه والي کې ونډه واخلي.
دغه پروګرام، چې د ملي ټولنو نړیوال فدراسیون په مالي ملاتړ پلي کېږي، موخه یې د حرفوي مهارتونو لوړول، د کوچنیو معیشتي فعالیتونو پیاوړتیا او د اړمنو کورنیو لپاره د عاید د دوامدارو سرچینو برابرول دي.
