سرپرست عمومي رئیس هرات کې د ملي ټولنو د نړیوال فدراسیون له مرستیال سره وکتل
یکشنبه، ۳ محرم الحرام ۱۴۴۷
د افغاني سرې میاشتې سرپرست عمومي رئیس ښاغلي شیخ الحدیث شهاب الدین دلاور او مل پلاوي هرات ته د خپل سفر په لړ کې د افغانستان لپاره د ملي ټولنو د نړیوال فدراسیون له مرستیال ښاغلي احمد سلیمان سره تازه راستنېدونکو کډوالو ته د ترسره کېدونکو خدمتونو د پراخوالي په موخه وکتل.
کتنه کې سرپرست عمومي رئیس د ملي ټولنو د نړیوال فدراسیون د استازو شتون د راستنېدونکو کډوالو په منځ کې مهم وباله او ویې ویل، له ګاونډیو هېوادونو څخه راستنېدونکي کډوال په ګڼو ستونزو کې دي، خو دا د خوښۍ ځای دی چې د افغاني سرې میاشتې له لوري د کډوالو په پنډغالو کې د مؤظفو کارکوونکو او رضاکارانو لخوا دوی ته د پخو خوړو، د څښاک پاکو اوبو او روغتیایي چوپړتياوو ترڅنګ بېلابېل خدمتونه له ځنډ پرته وړاندې کېږي.
دغه راز ښاغلي دلاور د راستنېدونکو کډوالو په پنډغالو په ځانګړې توګه د اسلام قلعه په پنډغالي کې د افغاني سرې میاشتې د کارکوونکو او رضاکارانو هڅې او زحمتونه وستایل او د لا ډېرې پاملرنې هیله یې وښوده.
د ملي ټولنو نړیوال فدراسیون مرستیال د افغاني سرې میاشتې له لوري کډوالو ته په پنډغالي کې پر روانو او ترسره شوو بشري خدمتونو خوښي وښوده او دغه خدمتونه یې د راستنېدونکو کډوالو لومړنیو ستونزو ته د ځواب وینې برخه کې مهم یاد کړل او د بشپړې همکارۍ ژمنه یې وکړه.
