د کابل ښار ۲۰۰ کورنیو ته د افغاني سرې میاشتې له لوري خوراکي مرسته وویشل شوه!
نن د یکشنبې په ورځ د روان ۱۴۰۰ کال د حوت د میاشتې په لومړۍ نېټه د افغاني سرې میاشتې د مرکزي ریاست په مرستون کې د افغاني سرې میاشتې د سرپرست عمومي مرستیال محترم ملا نورالدین ترابي په لاس د کابل ښار د ګڼو سیمو ۲۰۰ اړمنو او بې سرپرسته کورنیو ته د خوراکي توکو مرسته وویشل شوه.
په یاده مرسته کې هرې کورنۍ ته ۲۵ کیلو اوړه، ۵ لیتره غوړي، ۵ کیلو وریژې، ۲ کیلو لوبیا، ۲ کیلو دال نخود، ۱کیلو مالګه، ۲ کیلو بوره او نیمه کیلو چای شامل وو.
د افغاني سرې میاشتې سرپرست مرستیال محترم ملا نورالدین ترابي د مرستې د ویش پر مهال د پاکستان هېواد له ایدهي خیریه ټولنې مننه وکړه، چې یاده مرسته یې چمتو کړې وه.
