د ډنمارک سور صليب، افغاني سرې مياشتې سره د رواني ناروغانو د درملنې برخه کې مرسته کوي
کابل، پنجشنبه، ۲۲ ذوالحجه ۱۴۴۶ هـ.ق
د افغاني سرې میاشتې سرپرست عمومي رئیس ښاغلي شیخ الحدیث شهاب الدین دلاور او د نوموړي مرستیال ښاغلي حافظ عزیز الرحمن په مرکزي دفتر کې د ډنمارک د سره صلیب د رواني روغتیا د برخې مسؤلې آغلې زارا او مل پلاوي سره د رواني ناروغانو د درملنې او پالنې برخه کې د همکاريو د پراختيا په موخه وکتل.
کتنه کې سرپرست عمومي رئیس د افغاني سرې میاشتې له خوا په مرکز کابل او اوو زونونو په کچه د رواني ناروغانو د درملنې او پالنې مرکزونو کې د وړاندې کېدونکو خدماتو په اړه معلومات ورکړل او زياته يې کړه چې د يادو مرکزونو لپاره روغتیایي، خدماتي او د صفایۍ د برخې کارکوونکي ګمارل شوي او ترڅنګ يې د خوراک، څښاک او نورو اړتیاوو برخه کې هم لازم خدمات ناروغانو ته وړاندې کېږي.
ښاغلي دلاور له دوى غوښتنه وکړه څو د يادو مرکزونو د خدماتو د لا پیاوړتیا لپاره له سرې مياشتې سره مالي مرستې تر سره کړي.
راغلي پلاوي د افغاني سرې میاشتې بشري خدمتونه، په ځانګړي ډول د رواني ناروغانو لپاره د ترسره کېدونکو فعاليتونو ستاینه وکړه او ژمنه يې وکړه چې د رواني روغتیا برخه کې د لومړنیو مرستو برابرولو لپاره د روغتیايي کارکوونکو او رضاکارانو د روزنې ترڅنګ به هم نور کاري شریکان لا ډېرو همکاريو ته وهڅوي او هم به د هر ډول مالي او تخنیکي ملاتړ زمینه برابره کړي.
