د آلمان سولې کلي بنسټ: ۲۱۴ ناروغان په افغانستان او آلمان کې تر درملنې لاندې نيول کېږي
پنجشنبه، ۲۹ صفر ۱۴۴۸
د افغاني سرې میاشتې عمومي رئیس، ښاغلي شیخ الحدیث شهاب الدین دلاور او د نوموړي مرستیال ښاغلي حافظ عزیزالرحمن، په مرکزي دفتر کې د المان سولې کلي خیریه بنسټ له مسؤولینو ښاغلي ین يسن، آغلې کلاوډیا پپمولر او مل پلاوي سره د اړمنو ناروغانو د درملنې او روغتیايي همکاریو د پراختیا په اړه وکتل.
په ناسته کې د هغو ناروغانو د درملنې پر بهیر خبرې وشوې، چې د یاد بنسټ په مالي ملاتړ په افغانستان کې دننه درملنه کېږي او یا د تخصصي درملنې لپاره المان ته استول کېږي.
د سولې کلي مسؤولینو وویل، چې د دوی په مالي ملاتړ به ۷۹ ناروغان په المان او ۱۳۵ نور په افغانستان کې دننه تر درملنې لاندې ونیول شي.
د افغاني سرې میاشتې عمومي رئیس د بې وزله کورنیو د ناروغو ماشومانو د درملنې، د قلبي روغتون لپاره د يو شمېر طبي وسايلو او د دوى ملاتړ د رامنځته شوي يوه ګرځنده روغتیايي ټیم د فعالیتونو په برخه کې د المان سولې کلي خیریه بنسټ د همکاریو مننه وکړه او د دغو همکاریو د لا پراختیا غوښتنه یې وکړه.
ښاغلي دلاور وویل، چې د زړه سوري لرونکي زرګونه ماشومان لا هم درملنې ته اړتیا لري. نوموړي زیاته کړه، افغاني سره میاشت هڅه کوي د خپل قلبي روغتون ترڅنګ یوه بله ودانۍ هم جوړه کړي، څو د جراحي عملیاتو ظرفیت لوړ او په یوه وخت کې تر ۲۵ د زړه سوري لرونکو ماشومانو ته د تخصصي درملنې زمینه برابره شي.
له بل لوري، د المان سولې کلي خیریه بنسټ مسؤولینو د افغاني سرې میاشتې روغتیايي او بشري خدمتونه وستایل او د ګرځنده روغتیايي ټیم او قلبي روغتون د خدمتونو د پیاوړتیا لپاره یې د ملاتړ کوونکو د جلب او په نورو روغتیايي او بشري برخو کې د همکاریو د دوام ژمنه وکړه.
دواړو لورو د اړمنو ناروغانو درملنې ته د لاسرسي د پراخولو، د تخصصي روغتیايي خدمتونو د پیاوړتیا او د ګډو بشري پروګرامونو د دوام لپاره پر لا ډېرې همغږۍ او همکارۍ ټینګار وکړ.
