د هرات په روزنک بندر کې د ترکیې ۱۲۷۱ ټنه را استول شوې بشري مرسته افغاني سرې میاشتې ته وسپارل شوه

چهارشنبه، ۱۹ جمادي الآخره ۱۴۴۷
د هرات ولایت په روزنک بندر کې د ترکيې سرې مياشتې، افاد او IHH بنسټونو له لوري را استول شوې ۱۲۷۱ ټنه د خوراکي او غیر خوراکي توکو ۱۲مه جوپه بشري مرسته، د افغاني سرې میاشتې عمومي رئیس ښاغلي شیخ الحدیث شهاب الدین دلاور ته په هرات کې د یاد هېواد د سر قونسل په لاس وسپارل شوه.
د مرستې د سپارلو په مراسمو کې په افغانستان کې د ترکیې هېواد د سرې میاشتې مسؤول ښاغلي نعیم الله کریمي، د هرات والي شیخ الحدیث مولانا نور احمد اسلام جار، د لویدیځ زون، مرکزي او نماینده ګۍ رئیسانو، آفاد او آی اېچ اېچ خیریه بنسټ استازو ګډون درلود.
د مرستې د تسلیمۍ پر مهال ښاغلي دلاور د ترکیې هېواد له دوامدارو او همېشنیو مرستو مننه وکړه او ویې ویل، چې د ترکیې سرې میاشتې را استول شوې مرسته به په بشپړ شفافیت تر اړمنو او پېښځپلو کورنیو ورسول شي.
نوموړي زیاته کړه، چې افغاني سرې میاشتې د هېواد په ټولو ولایتونو کې خپلې بشري مرستې جاري ساتلي او د دې مرستې په ترلاسه کولو سره به افغاني سره مياشت وکولی شي، څو اړمنو ته د مرستو رسولو لړۍ لا پراخه کړي.

هرات کې د ترکیې سر قونسل ښاغلي اوغلو د یادې بشري مرستې په اړه وویل، "دغه ۱۲۷۱ ټنه د خوراکي او غیر خوراکي توکو مرسته د طبیعي او غیر طبیعي پېښو له امله د زیانمنو شوو کورنیو ستونزو د حل په موخه افغانستان ته را استول شوې او د ترکیې سره میاشت او نور خيريه بنسټونه به په هر ډول حالت کې د افغان ولس لاسنیوي او ملاتړ ته دوام ورکړي."
د یادونې وړ ده، چې تر دې وړاندې هم د ترکیې هېواد له لوري په ۱۱ جوپو کې سلګونه ټنه د خوراکي او غیر خوراکي توکو مرسته را استول شوې، چې د افغاني سرې میاشتې له لوري په پوره شفافیت پر مستحقو کورنیو وېشل شوې ده.