د افغاني سرې میاشتې سرپرست عمومي رییس ښاغلي مولوي مطیع الحق خالص د افغاني سرې میاشتې د مرکزي دفتر په مسجد کې کارکوونکو ته د هېواد د نافذه قوانینو د رعایت سپارښتنې وکړې!
د افغاني سرې میاشتې سرپرست عمومي رییس محترم مولوي مطیع الحق خالص د افغاني سرې میاشتې کارکوونکو ته د مرکزي دفتر په مسجد کې د هېواد د نافذه قوانینو اړوند یو لړ سپارښتنې وکړې.
نوموړي په خپلو خبرو کې وویل، چې افغاني سره میاشت د خپلې اساسنامې پر بنسټ د هېواد د نافذه قوانینو پر عملي کولو مکلفه ده او باید د افغاني سرې میاشتې هر کارکوونکی او اداره د هېواد هر تازه نافذېدونکی قانون پر ځان او کورنۍ عملي کړي او د هېواد قوانینو ته ژمنتیا ثابته کړي.
د افغاني سرې میاشتې سرپرست عمومي رییس همدا ډول په خپله وینا کې وویل، چې په دې وروستیو ورځو کې د امربالمعروف وزارت د حجاب اړوند شوې پرېکړې او طرحې ته باید د افغاني سرې میاشتې ټول کارکوونکي او ادارې جدي او دقیقه پاملرنه وکړي او یادې فیصلې ته بشپړ احترام ولري. نوموړي وویل، چې له تاسې ټولو مې غوښتنه ده مخکې تر دې چې د امربالمعروف وزارت مسؤلین مونږ د یاد وزارت له پرېکړو سرغړونې ته متوجې کړي؛ لازمه ده د هغوی له ویلو مخکې باید په خپلو کورونو کې او پر ځان مو د یاد وزارت پرېکړې پلې کړې وي.
د افغاني سرې میاشتې سرپرست عمومي رییس د امربالمعروف وزارت له لوري د حجاب اړوند کړې پرېکړې د یادونې په ترڅ کې وویل، چې د یاد وزارت د حجاب اړوند اعلان شوی حکم عملي کول د افغاني سرې میاشتې د هر فرد او ادارې مسوولیت دی او باید پر ځان او خپله کورنۍ د یادې پرېکړې عملي کول لازمي او جدي وګڼي.
نوموړي وویل موږ پوره کوښښ کوو، چې د افغاني سرې میاشتې له بنسټیز اصل سره سم استقلالیت ولرو او دې ته اړتیا پېښه نه شي، چې د وزارتونو او نورو ادارو له لوري زموږ عیبونه او سرغړونې را په ګوته شي، تدریجې په پام کې نیول شوي پړاوونه راباندې پلي شي او سزا راکول شي. دا زما مسؤلیت دی چې د افغاني سرې میاشتې د مسؤل په صفت د خپلو کارکوونکو شرعي کمزورتیاوو ته متوجه شم، د لرې کولو کوښښ یې وکړم او پرېنږدم، چې د افغاني سرې میاشتې په دایره کې د هېواد له نافذه قوانینو سرغړونه شتون ولري.
نوموړي د خپلو خبرو په پای کې وویل، چې د هېواد له نافذه قوانینو سره همغږي ګامونه اخیستل د افغاني سرې میاشتې د چارو د ښه پرمختګ لامل ګرځي او د ستونزو د ایجاد د مخنیوي لامل ګرځي.
