د افغاني سرې میاشتې سرپرست عمومي او مل پلاوي او د ICRC د نړیوالې کمیټې مشرې او مل پلاوي دوحه کې دوه اړخیزه ناسته ترسره کړه!

د افغاني سرې میاشتې سرپرست عمومي رئیس ښاغلي مولوي مطیع الحق خالص او مل پلاوي او د ICRC د نړیوالې کمیټې مشرې آغلې میرجانا سپولجاریک ایګر او مل پلاوي په افغانستان کې اړمنو ته د بشري مرستو په رسولو، د بېوزلو په لاسنیوي، روغتیایي خدماتو، د رواني ناروغانو پر ساتنه او درملنه او یو شمېر نورو موضوعاتو دوحه کې دوه اړخیزه ناسته ترسره کړه. ناسته کې ښاغلي مولوي مطیع الحق خالص د روغتیا او په نورو برخو کې د ICRC د نړیوالې کمیټې د همکارۍ مننه وکړه، د افغانستان پر اوسني وضعیت، ستونزو، اقتصادي ناورین او یو شمېر نورو موضوعاتو یې خبرې وکړې نوموړي وویل "افغاني سرې میاشتې په خپل لګښت د رواني ناروغانو درملنه او ساتنه، د سوري زړه په ناروغۍ د اخته ماشومانو او د بې سرپرسته کورنیو ساتنه او پالنه کوي، خو دا چې د یادو وګړو شمېر مخ په ډېریدو دی او د افغاني سرې میاشتې بودیجه ورته کفایت نه کوي؛ نو ځکه اړتیا ده د ICRC نړیواله کمیټه افغاني سرې میاشتې ته په یادو برخو کې د مرستې او جدي همکارۍ لاس ورکړي او له افغانستان سره د مرستو غږ تر نړیوالو مرسته کوونکو ورسوي. ښاغلي مولوي مطیع الحق خالص د ICRC له نړیوالې کمیټې غوښتنه وکړه، چې د افغاني سرې میاشتې له لارې د هېواد په هغو ولسوالیو کې روغتیایي او نور بشري خدمات پیل کړي، چې تېرو جګړو سختې ځپلي، خو تر اوسه په کې هیڅ ډول بشري او روغتیایي خدمات ندي شوي. ناسته کې د ICRC د نړیوالې کمیټې مشرې په بشري خدماتو کې د افغاني سرې میاشتې پر شفافیت د خوښۍ او تائید تر څنګ ژمنه وکړه، چې د یادو برخو د پرمخ وړلو  او پراختیا لپاره به هڅې کوي او کوښښ به کوي، چې نور مرسته کوونکي بنسټونه هم له افغاني سرې میاشتې سره مرستو ته راوبلي. نوموړې د افغاني سرې میاشتې له لوري په بشري مرستو کې ښځو او ماشومانو ته پر مساوي مرستو خوښي څرګنده کړه.