د افغاني سرې میاشتې او نړیوال فدراسیون د راستنو شوو کډوالو او زلزله ځپلو پر بېړنيو مرستو خبرې وکړې
شنبه، ۵ شعبان ۱۴۴۷
د افغاني سرې میاشتې د عمومي رئیس ښاغلي شیخ الحدیث شهاب الدین دلاور او په افغانستان کې د ملي ټولنو نړیوال فدراسیون د مشر ښاغلي حسام فیصل تر منځ راستنو شوو کډوالو او زلزله ځپلو کورنيو ته د بېړنیو بشري مرستو پر چمتو کولو او د هغوی ستونزو ته د رسېدنې په اړه د همغږۍ ناسته وشوه.
ناسته کې ښاغلي شيخ الحدیث شهاب الدین دلاور د راستنو شوو کډوالو او زیانمنو شوو کورنیو د بېړنیو اړتیاو او ستونزو په هکله معلومات شریک کړل او زیاته یې کړه، چې راستنې شوې کورنۍ د خوراکي توکو او سرپناه سربېره پراخو بشري مرستو ته اړتیا لري. ښاغلي دلاور څرګنده کړه، چې یادو کورنیو ته د خوراکي او غیر خوراکي توکو، روغتیايي خدمتونو، ژمنۍ البسې او سرپناه برابرول د افغاني سرې میاشتې لومړیتوب دی، خو دا اداره په يوازې ځان د ټولو راستنو شوو کورنیو ستونزو او اړتیاوو ته رسېدنه نه شي کولی او دې برخه کې د نړیوالو مرستندویه بنسټونو بشري مرستې مهمې دي.
په افغانستان کې د نړیوال فدراسیون مشر په خپلو خبرو کې وويل: زموږ اداره د راستنو شوو کډوالو او زلزله ځپلو کورنیو ملاتړ او لاسنیوي ته ژمنه ده او له افغاني سرې میاشتې ټولنې سره په همغږۍ به راستنو شوو او زیانمنو کورنیو ته د هغوی له اړتیاوو سره سم مرستې چمتو کړي. نوموړي ډاډ څرګند کړ، چې د یادو کورنیو ستونزې به د نورو مرستندویه بنسټونو له مسؤولینو سره شریکې کړي؛ څو د زیانمنو شوو کورنیو ستونزو ته پر وخت رسېدنه وشي.
