کندهار کې ۶۰۰ کورنیو ته د افغاني سرې میاشتې له لوري مرسته وویشل شوه
نن د جمعې په ورځ د کندهار ولایت په ژړۍ ولسوالۍ کې د افغاني سرې میاشتې له لوري د افغاني سرې میاشتې د سرپرست مرستیال ملا نورالدین ترابي په شتون کې ۶۰۰ اړمنو کورنیو ته مرسته وویشل شوه.
کندهار ولایت ته د سعودي عربستان د ملک سلمان خیریه بنسټ له لوري ۲۰۰۰ کورنیو ته د خوراکي او غیر خوراکي توکو مرسته چمتو شوې، چې د چمتو شوي پلان له مخې به له یادې مرستې ۱۶۰۰ کورنیو ته په ژیړۍ ولسوالۍ کې او پاتې ۴۰۰ نورو کورنیو ته د کندهار په مرکز کې وویشل شي.
په نننۍ ویشل شوې مرسته کې۸۰ کیلو اوړه، ۱۰ کیلو وریژې، ۱۰ کیلو لوبیا، ۶ کیلو بوره، ۶ کیلو دال، ۱۰ لیتره غوړي، یو د سړیو پټو، یو ښځینه ټیکری، ۱۰ جوړې جرابې، د ماشومانو ۴ خولۍ، یو جاکټ او یوه بړستن شامل دي.
