پکتیا: د افغاني سرې میاشتې مرستیال له مرستون، د رواني ناروغانو له مرکز او ملکیتونو ليدنه وکړه
سې شنبه، ۲۷ شوال ۱۴۴۷
د افغاني سرې میاشتې مرستیال، ښاغلي حافظ عزیز الرحمن، په پکتیا کې د سویل ختیځ زون په کچه له مرستون، د رواني ناروغانو د ساتنې او درملنې له مرکز او د دې ادارې له ملکیتونو څخه لیدنه وکړه.
ښاغلي مرستیال په مرستون کې د مېشتو اړمنو او بې سرپرسته کورنیو اړتیاوې و ارزولې او همداراز یې د رواني ناروغانو لپاره د وړاندې کېدونکو روغتیايي خدمتونو کیفیت، پخلنځی او استوګنځایونه وليدل.
نوموړي مسؤولینو ته له ناروغانو سره پر ښه چلند، نېکې رویې او د پاکوالي پر مراعت جدي ټینګار وکړ او هم يې د هغوی خدمتونه وستایل.
همداراز يې، د افغاني سرې میاشتې د ملکیتونو د وضعیت ارزونه هم وکړه او مسؤولینو ته يې لارښوونه وکړه، څو له دغو شتمنیو څخه په منظم او اغېزمن ډول ګټه واخلي، ترڅو د افغاني سرې مياشتې په عوایدو کې زیاتوالی را شي.
