کابل؛ د روغتيا او لومړنيو مرستو د روزونکو لپاره څلور ورځنی ورکشاپ پيل شو
دوشنبه، ۲۲ ذو الحجه ۱۴۴۷
د افغاني سرې مياشتې په مرکزي دفتر کې د دې ادارې د کندهار، اروزګان، زابل، هلمند، پکتيکا، کونړ او ننګرهار ولايتونو د روغتيا او لومړنيو مرستو د ۳۵ روزونکو لپاره څلور ورځنی ورکشاپ پيل شو.
د ورکشاپ د پرانيستې په مراسمو کې د روغتيايي خدمتونو رئيس ډاکټر عبد الله عرفان د روزنې او ظرفيت لوړونې پر اهميت خبرې وکړې او ويې ويل، چې په دې ورکشاپ کې به ګډونوالو ته په بېړنيو حالاتو کې د رضاکارانو د رول، د لومړنيو روغتيايي مرستو د وړاندې کولو او اړوندو عملي مهارتونو په اړه لازمې زده کړې ورکړل شي. نوموړي همدارنګه ګډونوالو ته د هر ډول همکارۍ ډاډ ورکړ.
ټاکل شوې ده، چې د دې څلور ورځني ورکشاپ په ترڅ کې به ګډونوالو ته د ملي ټولنو د پېژندنې، د پوليو واکسين د اهميت، د رضاکارانو د فعاليتونو د څارنې، د روزنې د اغېزمنو ميتودونو او د راپور ورکولو د سيستم په اړه اړين معلومات او عملي تجربې وړاندې شي.
دغه ورکشاپ د ملي ټولنو نړيوال فدراسيون په مالي ملاتړ ترسره کېږي.
افغاني سره مياشت د خپلو کارکوونکو او رضاکارانو د ظرفيت لوړولو له لارې هڅه کوي د روغتيايي او بشري خدمتونو کيفيت لا پياوړی او د بېړنيو حالاتو پر وړاندې د ځواب ويلو وړتيا لوړه کړي.
