بغلان؛ ۱۰۲ رضاکارانو ته د لومړنیو روغتیايي مرستو بستې ووېشل شوې
دوشنبه، ۱ ذو الحجه ۱۴۴۷
د افغاني سرې میاشتې له لوري د بغلان ولایت په مرکز پلخمري، مرکزي بغلان او خنجان ولسوالیو کې ۱۰۲ نارینه او ښځینه رضاکارانو ته د لومړنیو روغتیايي مرستو بستې ووېشل شوې.
یادې بستې د هغو ۱۷۰ رضاکارانو لپاره د مرستو د وېش لړۍ برخه ده، چې د بغلان ولایت په مرکز پلخمري، مرکزي بغلان، خنجان، بنو، دهنه غوري او دوشي ولسوالیو کې ترې برخمن شي.
ټاکل شوې ده، چې یاد رضاکاران به د دغو بستو په وسیله د بېړنیو پېښو پر مهال زیانمنو هېوادوالو ته لومړني روغتیايي خدمتونه وړاندې کړي.
د یادونې وړ ده، چې په راتلونکو ورځو کې به د بنو، دهنه غوري او دوشي ولسوالیو ۶۸ رضاکارانو ته هم د لومړنیو روغتیايي مرستو بستې ووېشل شي.
افغاني سره میاشت د رضاکارانو د ملاتړ او تجهیز له لارې هڅه کوي د بېړنیو پېښو پر مهال د لومړنیو روغتیايي مرستو وړاندې کولو کچه لا پیاوړې کړي.
