کونړ؛ عمومي رئیس د زلزله ځپلو وضعیت له نږدې و ارزاوه

شنبه، ۲۷ ربیع الأول ۱۴۴۷
د افغاني سرې میاشتې عمومي رئیس، ښاغلي شیخ الحدیث شهاب‌الدین دلاور، تېر ماښام ناوخته د کونړ ولایت، نورګل ولسوالۍ کې د زلزله ځپلو لپاره له  جوړ شوو دوو پنډغالو  لیدنه وکړه او د زیانمنو شوو کورنیو وضعیت یې له نږدې و ارزاوه.
ښاغلي دلاور د پنډغالو مسئولینو ته د مؤثرو او بېړنیو اقداماتو په اړه لازمې سپارښتنې وکړې او ټینګار یې وکړ، چې د زیانمنو شوو کورنیو اړتیاوو ته باید ژر او پر وخت رسېدنه وشي.
نوموړي وویل: افغاني سره میاشت د ولس د خدمت لپاره یوه خیرپاله ټولنه ده، چې خپل ټول شته امکانات به د هغو زیانمنو وګړو لپاره وکاروي، چې د وروستۍ زلزلې له امله یې د کورنۍ غړي او کورونه له لاسه ورکړي دي او له دوی څخه به خپلې هېڅ ډول مرستې ونه سپموي.
ښاغلي دلاور زیاته کړه: افغاني سره میاشت د خپل بشري رسالت پر بنسټ د تعهد، اخلاص او ایماندارۍ له مخې عمل کوي او تر هغو به د اغېزمنو کورنیو خدمت کوي، څو  وضعیت بېرته عادي حالت ته را وګرځي.