د افغاني سرې میاشتې په همغږۍ د قطر د سرې میاشتې په مالي ملاتړ د اړمنو د لاسنيوي په موخه د ٣ پروژو پرانيست غونډه ترسره شوه!
د افغاني سرې میاشتې په همغږۍ د قطر د سرې میاشتې په مالي ملاتړ د اړمنو د لاسنيوي په موخه د ٣ پروژو پرانيست غونډه ترسره شوه!
نن سه شنبه د شعبان میاشتې پر ۵ مه، د افغاني سرې میاشتې په همغږۍ د قطر د سرې میاشتې په مالي ملاتړ د روان زيږديز کال په ترڅ کې د ٣ نوو پلي کېدونکو پروژو پرانيسته د افغاني سرې میاشتې د مرستیال ښاغلي حافظ عزیزالرحمن، په افغانستان کې د قطر د سرې میاشتې مسؤل ښاغلي حسین احمد بوتاني او په افغانستان کې د نړیوال فدراسیون د مرستیال ښاغلي احمد سلیمان په شتون کې ترسره شوه.
غونډه کې د افغاني سرې مياشتې مرستیال د يادو پروژو پر پيليدا خوښي وښوده او ددې مهمو پروژو له لارې ترسره کېدونکې مرستې یې د اړمنو هېوادوالو ، بې سرپرسته کورنيو او معلولینو لپاره خورا زیاتې مهمې او اغېزمنې يادې کړې.
همدا راز ښاغلي عزیز الرحمن له افغاني سرې میاشتې سره په ستونزمنو حالاتو کې د قطر سرې میاشتې له هر اړخيزې همکارۍ څخه مننه وکړه او دواړو لوریو ترمنځ یې ګډه همکاري د بشري مرستو د پراختیا او دوام په پار يو مهم ګام وباله.
ورپسې په افغانستان کې د قطر د سرې میاشتې مسؤل په خپلو څرګندونو کې د يادو پروژو په اړه د هر اړخيزو معلوماتو د وړاندې کولو ترڅنګ دا پروژې د دواړو هېوادونو ترمنځ د اړیکو د ځواکمنتیا لپاره ارزښتمنې وګڼلې او زياته يې کړه چې موږ به له افغاني سرې میاشتې سره خپلې مرستې جاري وساتو.
دا راز په افغانستان کې د نړیوال فدراسیون مرستیال د افغاني سرې مياشتې ټولنه او د قطر سره مياشت د نړیوال فدراسیون غړې ملي ټولنې يادې کړې او د دا ډول پروژو د دوام د غوښتلو ترڅنګ يې دواړو لوریو ته مبارکي ورکړه.
د يادونې وړ ده چې د يادو ٣ مهمو پروژو له لارې به ۳۲۸ تنه معلولينو ته ویلچرونه، د روژې په مناسبت سمنګان او ارزګان ولایتونو ۸۵۰ کورنیو ته د خوراکي توکو بستې او په میدان وردګ او لوګر ولایتونو کې ۸۰۰ اړمنو کورنیو ته خوراکي توکي ووېشل شي.
