افغاني سرې میاشتې له لوري ۹۰مه چوپه، ٧٤ تنه هغه تنکي ماشومان چې په اور سخت سوځېدلي او يا د مکروبي هډوکو په رنځ اخته وو؛ د وړيا درملنې په موخه د المان "سولې کلي" خیریه بنسټ ته ور وپېژندل شول!
افغاني سره میاشت تل هڅه کوي؛ ترڅو هېوادوالو ته له بېلابېلو لارو د بشرپالو خدماتو ترسره کولو د لاسرسي زمینه برابره کړي. پر همدې بنسټ نن د ربيع الثاني پر ۲۳مه د افغاني سرې میاشتې له لوري ۹۰مه چوپه، ٧٤ تنه هغه تنکي ماشومان چې په اور سخت سوځېدلي او يا د مکروبي هډوکو په رنځ اخته وو؛ د وړيا درملنې په موخه د المان "سولې کلي" خیریه بنسټ ته ور وپېژندل شول. د المان سولې کلي خیریه بنسټ له ۱۹۸۸ کال راهیسې له افغاني سرې میاشتې سره په ګډه د هغو ماشومانو د درملنې په برخه کې کار کوي، چې هډوکي یې مکروبي وي او يا په اور سخت سوځېدلي وي او په هېواد کې دننه یې لازمه درملنه نشي کېدای. په یادو ناروغیو اخته ماشومان هر کال دوه ځل المان ته استول کېږي، چې درملنه یې وړیا ترسره کېږي او شپږ میاشتې وروسته بېرته هېواد ته راګرځي.ټاکل شوې ده، چې ياد ۷٤ ماشومان به دوه ورځې وروسته د ربيع الثاني پر ۲۵مه د درملنې په موخه المان هېواد واستول شي او ٦٤ هغه ماشومان چې شپږ میاشتې وړاندې د افغاني سرې میاشتې له لوري المان ته استول شوي وو؛ د درملنې د بهیر له بشپړولو وروسته هېواد ته راستانه شي.
