په ارزګان کې د افغاني سرې میاشتې له لوري له ۲۲۵۰ کورنیو سره مرسته وشوه

د ارزګان ولایت په مرکز کې د افغاني سرې میاشتې له لوري په روانه اونۍ کې له ۲۲۵۰ اړمنو، بې سرپرسته، وچکالۍ ځپلو او بې ځایه شویو کورنیو سره تر دا مهاله د ۸ قلمه خوراکي توکو مرسته شوې.

ددې مرستو پیل د روان ۱۴۰۰ لمریز کال د مرغومي پر ۱۷مه وشو، چې په کې ۵۰۰ کورنیو ته د مرغومي پر ۱۷مه، ۸۵۰ کورنیو ته د مرغومي پر ۱۸مه او ۹۰۰ کورنیو ته پرون د مرغومي پر ۱۹مه یاده مرسته وویشل شوه. ټاکل شوې په څو ورځو کې به په ارزګان ولایت کې د افغاني سرې میاشتې له لوري پیل شوې مرسته ټولټال ۳۰۰۰ اړمنو کورنیو ته وویشل شي.

په یاده مرسته کې ۸ قلمه مواد شامل دي، چې په کې ۵۰ کیلو اوړه، ۲۴.۵ کیلو وریژې، ۷ کیلو لوبیا، ۵ کیلو بوره، ۲ کیلو مالګه، ۱ کیلو چای، یوه قطعۍ BP۵ بسکوټ او ۱۰ لیتره غوړي شتون لري.