پنجشېر او بامیانو کې پر ۶۰۰ بېوزلو او راستنو شوو کورنیو د خوراکي توکو مرسته ووېشل شوه
چهارشنبه، ۱۲ جمادی الآخره ۱۴۴۷
د افغاني سرې میاشتې له لوري په پنجشېر کې پر ۳۰۰ بېوزلو کورنیو او په بامیانو کې پر ۳۰۰ بېوزلو او راستنو شوو کډوالو کورنیو په ټوله کې ۵۳.۴ ټنه د خوراکي توکو مرسته ووېشل شوه.
یاده مرسته چې د بېوزلۍ د کچې را کمولو په موخه ترسره شوه، هرې کورنۍ ته ۸۹ کیلو خوراکي توکي ورکړل شول، چې اوړه، غوړي، وریژې، بوره، نخود، مکروني، روب او خُرما په کې شامله وه.
همدا راز، هرې کورنۍ ته د روغتیا ساتنې په موخه ۳ چکۍ د لاس مینځلو صابون هم ورکړل شو.
تمه ده، چې دغه مرسته د یادو کورنیو لپاره د لنډمهاله خوراکي اړتیاوو په پوره کولو کې اغېزمنه تمامه شي.
