پنجشېر؛ ۵۰ رضاکارانو ته د خوندي لاسرسي او رضاکارانو د مدیریت ورکشاپ پای ته ورسېد
چهارشنبه، ۲۹ المحرم ۱۴۴۸
د افغاني سرې میاشتې د پنجشېر ولایتي نمایندګۍ کې ۵۰ تنو رضاکارانو ته د خوندي لاسرسي او رضاکارانو د مدیریت څلور ورځنی روزنیز ورکشاپ د تصدیق پاڼو په وېشلو سره پای ته ورسېد.
دغه ورکشاپ، چې د سره صلیب نړیوالې کمېټې په مالي ملاتړ دایر شوی و، ګډونوالو ته پکې د خوندي لاسرسي د اصولو، په بشردوستانه فعالیتونو کې د دغو اصولو د عملي تطبیق او د رضاکارانو د اغېزمن مدیریت په اړه نظري او عملي روزنه ورکړل شوه.
همدارنګه ګډونوالو ته د ساحوي فعالیتونو پر مهال د خوندي تګلارو د رعایت، د خدمتونو د اغېزمنې رسونې او له اړمنو هېوادوالو سره د خوندي تعامل په اړه لازم معلومات او عملي لارښوونې وړاندې شوې.
د دغه ورکشاپ موخه د رضاکارانو د مسلکي ظرفیت لوړول، د خوندي لاسرسي په اړه د هغوی د پوهاوي پیاوړتیا او په بېړنیو حالاتو او بشردوستانه عملیاتو کې د خوندي، چټکو او اغېزمنو خدمتونو د وړاندې کولو لپاره د هغوی چمتووالی و.
