نورستان؛ د مرستو لومړی پړاو پای ته ورسېد، دویم په برګمټال کې پیلېږي
دوشنبه، ۱۰ ذو القعده ۱۴۴۷
د نورستان ولایت په کامدېش ولسوالۍ کې د جګړو له امله اغېزمنو کورنیو ته د خوراکي مرستو د وېش لړۍ پای ته ورسېده، چې په ترڅ کې یې څه باندې ۱۰۵۰۰ کورنۍ له دغو مرستو برخمنې شوې.
په وېشل شوو مرستو کې اوړه، غوړي، دال، مالګه او د لاسونو د مینځلو صابون شامل وو.
ټاکل شوې ده، چې د همدې لړۍ په دوام به د برګمټال ولسوالۍ څه باندې ۶۰۰۰ کورنیو ته ورته مرستې ووېشل شي؛ څو د جګړو له امله زیانمنو کورنیو لومړنۍ اړتیاوې تر یوه حده پوره شي.
د يادونې وړ ده، چې دا مرستې د افغاني سرې مياشتې، د سره صليب نړيوالې کمېټې او د خوړو نړيوال پروګرام په ګډې همغږۍ ترسره کېږي.
