ملک سلمان د مرستو او بشري خدمتونو مرکز د سوري زړه ناروغانو د درملنې په برخه کې همکارۍ پراخوي
چهارشنبه، ۳ ربیع الأول ۱۴۴۷
د افغاني سرې میاشتې عمومي رئیس ښاغلي شیخ الحدیث شهاب الدین دلاور په افغانستان کې د اسلامي همکاریو سازمان له عمومي رئیس ښاغلي دوکتور محمد سعید العیاش، د سعودي عربستان د ملک سلمان د مرستو او بشري خدمتونو مرکز د رضاکارانه پروګرامونو د برخې مسئول ښاغلي دوکتور یوسف المطلق او د ماشومانو د زړه ناروغیو متخصص ډاکټر عبدالرحمن المسند سره د سوري زړه په رنځ اخته ماشومانو د درملنې برخه کې د همکاریو د پراختیا په موخه وکتل.
کتنه کې عمومي رئیس د اسلامي همکاریو سازمان او د ملک سلمان د مرستو او بشري خدمتونو مرکز له دوامدارو مرستو د مننې ترڅنګ زیاته کړه چې افغاني سره میاشت د خپلو بشرپالو فعالیتونو په لړ کې د سوري زړه په ناروغۍ د اخته ماشومانو سربېره د رواني ناروغانو د درملنې برخه کې دوامدار خدمتونه وړاندې کوي او د خپلو ثابتو کلینیکونو او ګرځنده روغتیايي ټیمونو له لارې هم د بېوزلو هېوادوالو لاسنیوي ته بشپړه ژمنتیا لري، نوموړي د راغلي پلاوي څخه غوښتنه وکړه څو د بشري مرستو ترڅنګ د سوري زړه ناروغانو د درملنې برخه کې د افغاني سرې میاشتې هر اړخیز ملاتړ وکړي.
د ملک سلمان د مرستو او بشري خدمتونو مرکز د رضاکارانه پروګرامونو د برخې مسئول د سرې میاشتې بشرپال خدمتونه اغیزمن وبلل او څرګنده یې کړه، چې ددې مرکز نږدې ۸۰سلنه فعالیتونه روغتیايي برخه رانغاړي، په همدې بنسټ په پام کې ده، چې نږدې راتلونکي کې په روغتیايي توکو سمبال یو متخصص او مسکلي ټيم افغانستان ته را واستول شي، څو د سوري زړه په ناروغۍ د اخته ماشومانو عملیات او درملنه وکړي.
