عمومي رئیس په افغانستان کې د ملي ټولنو نړیوال فدراسیون له سرپرست سره د همغږۍ ناسته وکړه
سې شنبه، ۱۶ ربیع الاول ۱۴۴۷
د افغاني سرې میاشتې عمومي رئیس ښاغلي شیخ الحدیث شهاب الدین دلاور، په افغانستان کې د ملي ټولنو نړیوال فدراسیون له سرپرست ښاغلي جُی سینګال او مرستیالې آغلې هُما نادر سره د زلزله ځپلو وګړو ستونزو ته د حل لارو موندنې په موخه د همغږۍ ناسته وکړه.
ناسته کې ښاغلي دلاور ختیځو ولایتونو کې د زلزلې له امله زیانمنو شویو کورنیو سره د ملي ټولنو نړیوال فدراسیون، کورنیو او بهرنيو خیریه بنسټونو او نړیوالو ملي ټولنو د مرستو مننه وکړه، دا مرستې یې د زلزله ځپلو کورنیو د اړتیاوو پوره کېدو برخه کې مهمې وبللې او د مرستو د جلب لپاره یې د همکارۍ او همغږۍ کچې په لوړولو ټینګار وکړ.
په افغانستان کې د ملي ټولنو نړیوال فدراسیون سرپرست د افغاني سرې میاشتې بشري خدمتونه وستایل او ډاډ یې وښود، چې له نړیوالو ملي ټولنو څخه به د کونړ ولایت زلزله ځپلو ته د لا ډېرو مرستو راجلبولو لپاره هڅې وکړي.
