عمومي رئیس تورخم کې د راستنېدونکو کډوالو له پنډغالي لیدنه وکړه
شنبه، ۲۰ ربیع الأول ۱۴۴۷
د افغاني سرې میاشتې عمومي رئیس، ښاغلي شیخ الحدیث شهابالدین دلاور، په تورخم عمري پنډغالي کې له روغتیايي کلینیک، د راستنېدونکو کډوالو له بهیر او د پخو خوړو له وېش لیدنه وکړه.
لیدنه کې ښاغلي دلاور، راستنېدونکو کډوالو ته د هر راز همکارۍ ډاډ ورکړ، پنډغالي کې یې د افغاني سرې میاشتې روغتیايي کلینیک کارکوونکو ته له کډوالو سره د نېک چلند، ښو او پر وخت خدمتونو په ترسره کولو د ټینګار سربېره ځینې لازمې سپارښتنې هم وکړې او د پخو خوړو د وېش بهیر یې له نزدې و ارزوه.
د يادونې وړ ده، چې د افغاني سرې مياشتې له لوري د تورخم په عمري پنډغالي کې هره ورځ پر ۲ زره کډوالو پاخه خواړه وېشل کېږي، سلګونه ناروغانو ته وړيا روغتيايي خدمتونه وړاندې کېږي او سلګونه کډوالو کورنيو ته د لنډ مهالې سرپناه په موخه د استوګنې زمینه هم برابره شوې ده.
