سمنګان کې پر ۳۰۰ زلزله ځپلو کورنیو نغدي مرسته ووېشل شوه
جمعه، ۲۳ جمادی الأولی ۱۴۴۷
د افغاني سرې مياشتې عمومي رئیس، ښاغلي شيخ الحديث شهاب الدين دلاور له مل پلاوي سره شمال زون ته د خپل سفر په ترڅ کې د سمنګان ولایت په فېروزنخچیر ولسوالۍ کې ۳۰۰ زلزله ځپلو کورنيو ته درې میلیونه او یو سل و پنځوس زره (۳،۱۵۰،۰۰۰) افغانۍ نغدي مرسته ووېشله، چې هرې کورنۍ ته ۱۰،۵۰۰ افغانۍ ورکړل شوې.
د مرستې د وېش پر مهال ښاغلي دلاور د زلزلې له امله زيانمنو کورنیو ته د دې سترې غمیزې په اړه خپل تسلیت وړاندې کړ او ژمنه يې وکړه، چې د هغو کورنیو غړي چې د زلزلې له امله شهیدان شوي دي، هرې کورنۍ ته به په نږدې ورځو کې پنځوس زره افغانۍ ورکړل شي.
په پای کې ښاغلي دلاور د نړیوالو کاري شریکانو، په ځانګړې توګه د ملي ټولنو نړیوال فدراسیون څخه مننه وکړه، چې تل یې د طبیعي او غیر طبیعي پېښو پر مهال د پېښځپلو وګړو لاسنیوی کړی. هغه زیاته کړه، چې د دغو خیریه سازمانونو او نړیوالو کاري شریکانو همکاري د لویو بشري کړاوونو په وړاندې یو ستر ملاتړ دی، چې د دې مرستو له لارې د زیانمنو شوو خلکو ژوند یوه اندازه پر ځان بسیا کېدلی شي.
