د لوی اختر په مناسبت پر ۲۰۰۰ اړمنو کورنیو غوښه ووېشل شوه
شنبه، ۱۰ ذوالحجه ۱۴۴۶
د لوی اختر په اوله ورځ، د افغاني سرې میاشتې له لوري د کابل په مرکزي مرستون کې د ترکیې د سرې میاشتې او د دیانت خیریه بنسټ په مالي ملاتړ، پر ۲۰۰۰ اړمنو کورنیو ۱۰،۰۰۰ کیلو ګرامه غوښه د سرپرست عمومي رئیس ښاغلي شیخ الحدیث شهاب الدین دلاور، په افغانستان کې د ترکیې سفیر ښاغلی جنک اونال او په کابل کې د ديانت بنسټ سلاکار ښاغلي دوکتور امراه کان دمير په شتون کې ووېشل شوه.
سرپرست عمومي رئیس د مرستې د وېش پر مهال د ترکيې د سرې مياشتې او د ترکيې د ديانت بنسټ له هر اړخیزو او دوامداره مرستو د مننې ترڅنګ دا ډول مرستې د بې وزلو او اړمنو کورنيو د لاسنيوي په برخه کې مؤثرې وبللې او زياته يې کړه چې دا ډول مرستې نه يوازې د اړمنو لاسنيوی کوي، بلکې د دواړو هېوادونو تر منځ د دوستۍ او همدردۍ فضا هم پياوړې کوي.
دا راز ښاغلي شيخ دلاور څرګنده کړه، چې د اختر په دويمه او دريمه ورځ به هم په ميدان وردګ، لوګر او کاپيسا ولايتونو کې اړمنو هېوادوالو ته د غوښې د وېش تر څنګ خوراکي توکي هم ووېشي.
ورپسې د ترکیې سفیر په خپلو خبرو کې د افغانستان له خلکو سره د مرستو د دوام ژمنه وکړه او د افغانستان او ترکیې اړیکې یې تاریخي او دوستانه وبللې.
وروسته ښاغلي کان دمير څرګنده کړه چې د ديانت بنسټ هوډ لري څو د افغانستان په پنځو ولايتونو کې ٣٢،٠٠٠ اړمنو وګړو ته د قربانۍ غوښه ووېشي او ډاډ يې وښود چې د افغان ولس د لاسنيوي برخه کې به خپلو هڅو ته دوام ورکړي.
د يادونې وړ ده، چې د نننۍ مرستې څخه ۱۰۰۰ کورنيو ته ۵۰۰۰ کیلو ګرامه غوښه د ترکیې د سرې میاشتې له لوري او پاتې ۱۰۰۰ کورنیو ته ۵۰۰۰ کیلو ګرامه غوښه د دیانت خیریه بنسټ په مالي مرسته ووېشل شوه چې هرې اړمنې کورنۍ ته پنځه پنځه کيلو غوښه ورکړل شوه
