د جوزجان ولایت په فیض آباد ولسوالۍ کې د افغاني سرې میاشتې له لوري ۴۰۰ اړمنو کورنیو ته د خوراکي توکو مرسته وویشل شوه!
د جوزجان ولایت په فیض آباد ولسوالۍ کې د افغاني سرې میاشتې له لوري نن او پرون د روان ۱۴۰۰ کال د مرغومي پر ۶مه او ۷مه نېټه ۴۰۰ اړمنو کورنیو ته د خوراکي توکو مرسته وویشل شوه.
په یاده مرسته کې اته قلمه خوراکي مواد شامل دي، چې په کې ۱۰۰ کیلو اوړه، ۴۹ کیلو وریژې، ۲۰ لیتره غوړي، ۱۰ کیلو بوره، ۱۴ کیلو لوبیا، ۲ کیلو شین چای، ۴ کیلو مالګه او ۲ پاکټ BP۵ بکسټ شتون لري. یاده مرسته د نړیوال فدراسیون له لوري چمتو شوې وه او په شمال زون کې د افغاني سرې میاشتې د رییس شیخ یار محمد په شتون کې وویشل شوه.
تېره ورځ هم د جوزجان ولایت په مردیان ولسوالۍ کې د افغاني سرې میاشتې له لوري ۳۳۵ اړمنو کورنیو ته د خوراکي توکو مرسته ویشل شوې وه. دا په تېرو څو ورځو کې په جوزجان ولایت کې د افغاني سرې میاشتې له لوري د خوراکي توکو درېیم ځای مرسته ده، چې اړمنو کورنیو ته ترسره کېږي. له فیض اباد او مردیان ولسوالیو مخکې په منګجیک ولسوالۍ کې هم افغاني سرې میاشتې ۳۵۰ اړمنو کورنیو ته مرسته ویشلې وه.
