د افغاني سرې میاشتې ټولنې عمومي سرپرست رییس ښاغلي مولوي مطیع الحق خالص د قطر هېواد د سرې میاشتې له استازو سره وکتل!
نن یکشنبه د روان ۱۴۰۱ لمریزکال د وري (حمل) میاشتې پر ۷ مه نېټه د افغاني سرې میاشتې سرپرست رییس ښاغلي مولوي مطیع الحق خالص د قطر د سرې میاشتې له استازو ښاغلي سعید او آغلې نجلا سره په خپل کاري دفتر کې لیدنه ترسره کړه.
په پیل کې د افغاني سرې میاشتې سرپرست رییس ښاغلي مولوي مطیع الحق خالص د راغلو مېلمنو هرکلی وکړ او د قطر هېواد د سرې میاشتې له مرستو په ځانګړې توګه، چې له ۲۰۱۴زیږدیزکال را په دیخوا یې د روغتیا په برخه تر سره کړي مننه وکړه. نوموړي وویل څرنګه چې تاسو ته مالومه ده په دې وروستیو کې د افغانستان وکړي له بېلابېلو اقتصادي ستونزو سره لاس او ګریوان دي، چې لاسنیوي او مرستو ته اړتیالري. همدارنګه نوموړي د قطرهېواد د سرې میاشتې استازي له افغانانو سره لازیاتو مرستو او همکاریو ته وهڅول.
په مقابل کې د قطر د سرې میاشتې استازو ښاغلي مولوي مطیع الحق خالص ته له افغاني سرې میاشتې ټولنې سره د خپلو مرستو پر دوام ډاډ ورکړ او همداراز یې وویل زمونږ د اوسني سفر موخه داده تر څو د نویو پروژو سروې او د پلي کولو په برخه کې یې اقدام وکړو، ځکه په دې وروستیو کې د افغانستان وګړي د تیر په پرتله ډېرو مرستو ته اړتیا لري.
د افغاني سرې میاشتې ټولنې رییس ښاغلي مولوي مطیع الحق خالص د نوموړو د دې اقدام ستاینه وکړه او د هر راز مرستو ډاډ یې ورکړ.
