د افغاني سرې میاشتې سرپرست عمومي رئيس د نړيوال فدراسيون د آسيا پاسيفيک حوزې له مشر سره وکتل!
د افغاني سرې میاشتې سرپرست عمومي رئيس د نړيوال فدراسيون د آسيا پاسيفيک حوزې له مشر سره وکتل!
نن پنجشنبه د رجب د میاشتې پر ٢۲مه، د افغاني سرې میاشتې سرپرست عمومي رئيس ښاغلي شیخ الحدیث شهاب الدین دلاور او د نوموړي مرستیال ښاغلي حافظ عزیز الرحمن د کابل په مرکزي دفتر کې د نړيوال فدراسيون د آسيا پاسيفيک حوزې له مشر ښاغلي الکساندر ماتيو او په افغانستان کې د نړیوال فدراسیون له مشر ښاغلي نېسېفور مګېنډي سره د بشر دوستانه مرستو او همکاريو د پياوړتيا په موخه ناسته ترسره کړه.
ناسته کې د افغاني سرې میاشتې سرپرست عمومي رئيس ددې خيريه ملي ټولنې د ورستیو ترسره کړو بشرپالو فعاليتونو او راتلونکو پلانونو په تړاو د معلوماتو د شریکولو ترڅنګ د بشرپالو مرستو د پراختیا او د روغتيايي خدماتو د ترسراوي په برخه کې د مالي ملاتړ د ډېروالي غوښتنه وکړه.
همدا راز ښاغلي دلاور د نړيوال فدراسيون له دوامدارو او همېشنيو مرستو مننه وکړه او له ياد پلاوي يې وغوښتل څو د ژمي په درشل کې د اړمنو لاسنیوي او له دوى سره بیړنیو مرستو ته لومړيتوب ورکړي.
ورپسې ښاغلي ماتيو په خپلو خبرو کې د افغاني سرې مياشتې د مالي ملاتړ لپاره د سره صليب نړيوالې ټولنې، اروپایي ټولنې، د برتانیې او فینلینډ سور صلیبونو له لوري د مرستو د چمتو والې ډاډ څرګند کړ او په بېلابېلو برخو کې يې د مرستو د پراختیا او لا زیاتوالی ژمنه وکړه.
