د افغاني سرې مياشتې ستراتیژیک پلان د پوهاوي په اړه یو ورځنی ورکشاپ دایر شو
سې شنبه، ۱۴ ربیع الآخر ۱۴۴۷
د افغاني سرې میاشتې مرکزي دفتر کې د مرکز، سیمه ییزو زونونو، ولایتي نماینده ګیو او مستقلو آمریتونو مسئولینو ته د ستراتيژیک پلان د پوهاوي په موخه یو ورځنی روزنیز ورکشاپ ترسره شو.
ورکشاپ کې د افغاني سرې میاشتې عمومي رئیس ښاغلي شیخ الحدیث شهاب الدین دلاور، د نوموړي مرستیال ښاغلي حافظ عزیز الرحمن، د سکرتر جنرال عملیاتي مرستیال ښاغلي مولوي روح الله عبدالسلام او نړیوالو کاري شریکانو ( آی، سي، آر، سي او ملي ټولنو نړیوال فدراسیون) استازو هم ګډون درلود.
د ورکشاپ په پرانیسته کې د افغاني سرې میاشتې عمومي رئیس د ستراتیژیک پلان د اړتیا، ارزښت او موخو په اړه هر اړخیز معلومات وړاندې کړل او څرګنده یې کړه چې د سیمه ییزو زونونو او ولایتي نماینده ګیو د مسؤلینو نظریات او تجربې د دغه پلان په پیاوړتیا او اغېزمنتیا کې مهم رول لري. نوموړي له ټولو ګډونوالو وغوښتل، چې د خپلو اړوندو ولایتونو د کاري لومړیتوبونو، اړتیاوو او ننګونو په اړه خپلې تجربې او نظریات شریک کړي، څو داسې یو جامع او موثر ستراتیژیک پلان جوړ شي چې د ټولنې اړتیاوو ته واقعي ځواب ووایي.
له بل خوا د سکرتر جنرال عملیاتي مرستیال ښاغلي مولوي روح الله عبدالسلام ستراتیژیک پلان د یوې ادارې د اوږد مهاله اهدافو د ترلاسه کولو لپاره یو مهم سند او اداري چارو د تنظیم برخه کې اساسي نقشه وګڼله. نوموړي زیاته کړه چې دا پلان نه یوازې د افغاني سرې میاشتې کاري بهیر منظموي، بلکې له نړیوالو کاري شریکانو سره د همکاریو پراخولو، شفافیت او مرستو د مؤثریت برخه کې هم اغېزمن تمامېدای شي.
یاد ورکشاپ کې برخه والو ته د ستراتیژیک پلان د پېژندنې، اړتیا، موخو او جوړښت په اړه مفصل معلومات وړاندې شول.
