بامیان؛ ۲۳ کارکوونکو او رضاکارانو ته د ظرفیت لوړونې ورکشاپ پای ته ورسېد
چهارشنبه، ۲۲ المحرم ۱۴۴۸
د افغاني سرې میاشتې له لوري د بامیانو ولایت په نمایندګۍ کې ۲۳ تنو کارکوونکو او رضاکارانو ته د ظرفیت لوړونې دوه ورځنی ورکشاپ د تصدیق پاڼو په وېشلو پای ته ورسېد.
د ورکشاپ په ترڅ کې ګډونوالو ته د افغاني سرې میاشتې د تاریخچې، بنسټیزو اصولو، نښان، بشري خدمتونو او د دندو د اغېزمن ترسره کولو په اړه نظري او عملي معلومات او لارښوونې وړاندې شوې.
دغه ورکشاپ د دې لپاره جوړ شوی و، چې د کارکوونکو او رضاکارانو مسلکي وړتیاوې لا پیاوړې شي او وکولای شي اړمنو هېوادوالو ته بشري خدمتونه په چټک، اغېزمن او معیاري ډول وړاندې کړي.
د ظرفیت لوړونې دغه ډول پروګرامونه د افغاني سرې میاشتې د کارکوونکو او رضاکارانو د مسلکي وړتیاوو د پیاوړتیا او د بشري خدمتونو د کیفیت د ښه والي لپاره مهم رول لري.
