کابل؛ د زړه او رواني ناروغانو لپاره د درملو د برابرولو په اړه خبرې وشوې
چهارشنبه، ۲۲ المحرم ۱۴۴۸
د افغاني سرې میاشتې عمومي رئیس، ښاغلي شیخ الحدیث شهاب الدین دلاور، په خپل کاري دفتر کې له یو شمېر ازبکستاني سوداګرو سره د زړه او رواني ناروغانو لپاره د اړتیا وړ درملو د برابرولو او روغتیايي همکاریو د پراختیا په اړه وکتل.
په دې ناسته کې ښاغلي دلاور د افغاني سرې میاشتې د بشري او روغتیايي خدمتونو په اړه معلومات وړاندې کړل او ویې ویل، چې دې ادارې د سوري زړه ناروغانو د درملنې لپاره یو مجهز تخصصي روغتون جوړ کړی، چې په نږدې راتلونکي کې به خپل فعالیت پیل کړي او په کلني ډول به شاوخوا ۲۰۰۰ د سوري زړه ناروغانو ته د عملیاتو او درملنې خدمتونه وړاندې کړي.
نوموړي زیاته کړه، چې افغاني سره میاشت دا مهال د هېواد په بېلابېلو مرکزونو کې نږدې ۱۵۰۰ رواني ناروغان تر درملنې لاندې لري او څه د پاسه ۱۵۰۰ نورو ناروغانو ته په خپلو کورونو کې روغتیايي خدمتونه او دوامداره درمل وړاندې کوي.
ښاغلي دلاور له ازبکستاني سوداګرو وغوښتل، چې د زړه او رواني ناروغانو لپاره د اړتیا وړ درملو د برابرولو او د روغتیايي خدمتونو د پیاوړتیا په برخه کې له افغاني سرې میاشتې سره همکاري وکړي.
له بلې خوا ازبکستاني سوداګرو د افغاني سرې میاشتې د بشري او روغتیايي فعالیتونو ستاینه وکړه او ډاډ یې ورکړ، چې د یادو ناروغانو لپاره د اړتیا وړ درملو د برابرولو په برخه کې به له دې ادارې سره لازمې همکارۍ وکړي.
دواړو لورو د روغتیايي همکاریو د پراختیا، د درملو د تأمین او د اړمنو ناروغانو د درملنې په موخه د اسانتیاوو د پیاوړتیا لپاره د ګډو همکاریو پر دوام ټینګار وکړ.
