افغاني سرې میاشتې د ټولنیز ګډون له امله د کویډ ۱۹ د ګواښ په اړه د پوهاوي ورکشاپونه پیل کړل!
د ټولنیز ګډون له امله د کویډ۱۹ د ګواښ په اړه د پوهاوي ورکشاپونه نن د روان ۱۴۰۰ لمریز کال د مرغومي پر ۴مه د افغاني سرې میاشتې په مرکزي ریاست، ننګرهار، کونړ او کندهار کې پرانیستل شول. د افغاني سرې میاشتې په مرکزي ریاست کې د ټولنیز ګډون له امله د کویډ ۱۹ د ګواښ په اړه د پوهاوي ورکشاپ د افغاني سرې میاشتې د سرپرست عمومي رییس مولوي مطیع الحق خالص په وینا پرانیستل شو.
ښاغلي مولوي مطیع الحق خالص د ورکشاپ ګډون کوونکو او مېلمنو ته وویل، چې «دوی دې د کویډ ۱۹ په اړه لازم پوهاوی ترلاسه او د کویډ ۱۹ د را روانې احتمالي څپې پر وړاندې دې ولسونو ته لازم پوهاوی ورکړي؛ ترڅو له کویډ۱۹ سره مبارزه وکړای شي».
نوموړي وویل، چې «د نړیوال فدراسیون په مالي مرسته د کویډ۱۹ پر وړاندې د افغاني سرې میاشتې روانه هڅه به درې پړاوونه ولري، چې په لومړي پړاو کې به یې په کابل، ننګرهار، کونړ او کندهار کې د عامه پوهاوي فعالیتونه د رضاکارانو او د ټولنې خلک په ټاکل شویو ځایونو کې ترسره کوي. په ورپسې دویم پړاو کې به یې د امکاناتو په شتون کې په لسو ولایتونو کې د کرونا واکسین تطبیقېږي او په درېیم پړاو کې به د ګرځنده روغتیایي ټیمونو په ډول د روغتیا د ډیپارټمنټ پینځه بسونه د کرونا واکسین د هېواد په پینځه لویو ښارونو کې سر ته رسوي».
په دې پرانیست غونډه کې افغانستان کې د نړیوال فدراسیون مشر ښاغلي نیسفوړ هم وینا وکړه. نوموړي په خپله وینا کې له افغاني سرې میاشتې مننه وکړه، چې د کویډ۱۹ پر وړاندې د مبارزې هڅې کوي او ولسونه له احتمالي ګواښونو خبروي.
ورپسې د افغاني سرې میاشتې د روغتیا رییس ښاغلي محمد سلیم بهرمند وینا وکړه او د ورکشاپ له ګډون کوونکو یې وغوښتل، چې په سمه توګه خپل مسوولیتونه درک او ترسره کړي.
له ټاکل شوي پلان سره سم له کابل سره هممهالي په ننګرهار، کونړ او کندهار ولایتونو کې هم د ټولنیز ګډون له امله د کویډ ۱۹ د ګواښ په اړه د پوهاوي ورکشاپونه پیل شوي، چې په څلور واړو ولایتونو کې د افغاني سرې میاشتې ۲۰۰۰ رضاکارانو ګډون کړی.
یاد ورکشاپونه به دوه ورځې دوام وکړي او له دوه ورځو وروسته به یاد ۲۰۰۰ کسان د عملي کار لپاره ټولنې ته د خدمت په موخه وړاندې شي؛ تر څو د یاد ویروس د مخنیوي لارې چارې خلکو ته په اسانه او عام فهمه توګه ورسول شي.
