د سرې میاشتې سرپرست رییس مولوي مطیع الحق خالص د نړیوال فدراسیون له مشر او مرستیال سره لیدنه ترسره کړه!
نن د ۱۴۰۰لمریز کال د لړم پر ۱۹مه د سرې میاشتې سرپرست رییس مولوي مطیع الحق خالص د سره صلیب او سرې میاشتې د نړیوال فدراسیون له رییس نیسفوړ او مرستیال نیلسن سره د سرې میاشتې په مرکزي دفتر کې ناسته ترسره کړه. په دې ناسته کې د افغانستان لپاره د نړیوال فدراسیون نوی ټاکل شوی مرستیال نیلسن او په افغانستان کې د نهضت د غړو د همغږۍ آمره نینکا بوسکما (په غیاب کې) محترم مولوي مطیع الحق خالص ته معرفي کړل شول.
ددې تر څنګ په دې ناسته کې د سرې میاشتې د ښه فعالیت او د افغانانو مشکلاتو ته د لاسرسي په اړه خبرې وشوې. د افغاني سرې میاشتې رییس محترم مولوي مطیع الحق خالص هیله وښوده، چې له نړیوال فدراسیون سره به ګډ کار کوي او دواړه لوري به په ګډه د خیریه چارو په ترسره کولو کې لاسونه ورکوي.
افغانستان کې د نړیوال فدراسیون مشر نیسفوړ وویل، چې دوی اراده لري په دوه اونیو کې دننه یوه اندازه خوراکي توکي سرې میاشتې ته وسپاري او له دې وروسته به خوراکي مواد دننه په افغانستان کې پېري. د نړیوال فدراسیون له لوري د دغه اقدام هوډ د محترم مولوي مطیع الحق خالص له لوري وستایل شو او ویې ویل، چې په دې کار سره به د افغانستان پرېوتی اقتصاد وده وکړي. نوموړي وویل، چې دوی به هڅه وکړي چې د نړیوال فدراسیون له لوري دوی ته سپارل کېدونکي خوراکي توکي اړمنو وګړو ته پر وخت ورسوي ترڅو د هوا د یخنۍ له امله خراب نشي.
ښاغلي مولوي مطیع الحق خالص په افغانستان کې د نړیوال فدراسیون مشر ته وویل، چې دی هڅه کوي په افغاني سره میاشت کې وړ او په کار پوه کسان وګوماري.
