د ترکیې د سرې میاشتې رییس او د نړیوال فدراسیون مرستیال ښاغلی کریم کنیک افغانستان ته په درې ورځني سفر راغی!
نن د جمعې په ورځ د ترکیې د سرې میاشتې رییس او د نړیوال فداراسیون مرستیال ښاغلی کریم کنیک افغانستان ته په خپل درې ورځني را ورسېد. د نوموړي هرکلي ته د افغاني سرې میاشتې سرپرست عمومي رییس مولوي مطیع الحق خالص، کابل کې د ترکیې سفیر او یو شمېر نور لوړ پوړي مقامات ورغلي وو.
ښاغلي کنیک په کابل هوایي ډګر کې خبریالانو ته وویل، چې مونږ د افغانانو تر څنګ ولاړ یو؛ افغانان غیرتي خلک دي او ډېر زر به له روان بد حالت څخه ووځي. نوموړي وویل، چې دی د افغاني سرې میاشتې په بلنه افغانستان ته راغلی؛ ترڅو د افغانستان روان بشري وضعیت له نېږدې و ارزوي او د بشري مرستو په ډېرښت کې یې لاس په کار شي.
د افغاني سرې میاشتې سرپرست رییس ښاغلي مولوي مطیع الحق خالص کابل هوایي ډګر کې خبریالانو ته وویل، چې مونږ له ترکیې غواړو چې له افغانانو سره اوږه په اوږه ودرېږي او د مرستې لاس ورکړي. نوموړي وویل مونږ به د ترکیې له سرې میاشتې او نړیوال فدراسیون سره په ګډه پر دې کار وکړو، چې څنګه په ګډه افغانانو ته ښه ورځ راګرځولی شو. نوموړي وویل، چې مونږ هڅه کوو له نړیوالو سره په ښه تعامل له افغانستان سره د مرستو دروازه پرانیستې پاتې شي او نورې دروازې هم پرانیزو.
ټاکل شوې د ترکیې د سرې میاشتې رییس او د نړیوال فدراسیون مرستیال ښاغلی کریم کنیک به سبا شنبه د افغاني سرې میاشتې له سرپرست رییس ښاغلي مولوي مطیع الحق خالص سره یو نیم ساعت اوږده ناسته ولري.
