د افغاني سرې میاشتې سرپرست عمومي رئیس د چين له سفير سره د بشري مرستو د پراختيا په موخه وکتل!
د افغاني سرې میاشتې سرپرست عمومي رئیس د چين له سفير سره د بشري مرستو د پراختيا په موخه وکتل!
نن پنجشنبه د شعبان د میاشتې پر ۱۴مه، د افغاني سرې میاشتې سرپرست عمومي رئیس ښاغلي شیخ الحدیث شهاب الدین دلاور او د نوموړي مرستیال ښاغلي حافظ عزیز الرحمن د دې خیریه ملي ټولنې په مرکزي دفتر کې په کابل کې د چين له سفير ښاغلي ژاو شېنګ او د مل پلاوي سره د اړمنو د لاسنيوي په برخه کې د بشري مرستو د پراختيا او يو لړ نورو مهمو موضوعاتو په موخه ناسته وکړه.
سرپرست عمومي رئیس دوى ته تر ښه راغلاست ويلو وروسته د افغاني سرې مياشتې له لوري د ترسره کېدونکو بشرپالو فعاليتونو او خدماتو په اړه تفصيلي معلومات وړاندې کړل او چين ته يې د خپل وروستي سفر په ترڅ کې د چين د سره صليب له مسٸولينو سره خپلې ليدنې ګټورې يادې کړې او د دواړو لوريو ترمنځ يې ګډې همکارۍ او همغږۍ د اړمنو د لاسنيوي، د پېښځپلو ستونزو ته پر وخت د ځواب وينې او د زړه سوري ناروغانو د درملنې په برخه کې ضروري وبللې.
دا راز ښاغلي دلاور د افغاني سرې مياشتې له لوري د زړه سوري ناروغانو د درملنې په پار د ځانګړې جوړېدونکې شفاخانې لپاره د تخنيکي وسايلو او تجهيزاتو د چمتو کولو، په چين کې د زړه سوري ناروغانو د درملنې لپاره د زمينې برابرولو او په کابل کې ددې خيريه ملي ټولنې د مرکزي شفاخانې د نوي تعمير د رغولو په برخه کې له ياد پلاوي د همکارۍ غوښتنه هم وکړه.
ښاغلي ژاو شېنګ د افغاني سرې مياشتې د مشرتابه سره په ليدو خوښي وښوده او د بشري مرستو د دوام او د سرې مياشتې د ملاتړ په تړاو د ژمنتيا وړاندې کولو ترڅنګ يې ډاډ څرګند کړ چې دوى پام کې لري څو د ياد هېواد له لوري د يو تخنيکي ټيم تر راتګ او د زړه سوري ناروغانو د وضعيت تر ارزونې وروسته به په چين کې د يادو ناروغانو د درملنې زمينه هم برابره کړي.
همدا راز ښاغلي سفير زياته کړه چې په نزدې راتلونکي کې به د چين د سره صليب اجرايوي مشر افغانستان ته سفر وکړي او د دواړو لوريو ترمنځ به د ګډو همکاريو د پياوړتيا او بشري مرستو د پراختيا په برخه کې مهمې هوکړې وکړي.
