په المان کې تر درملنې وروسته ۱۹ ماشومان هېواد ته راستانه شول
شنبه، ۶ ذو الحجه ۱۴۴۷
د افغاني سرې میاشتې له لوري المان هېواد ته د درملنې لپاره استول شوي ۱۹ تنه هغه ماشومان، چې په اور سخت سوځېدلي وو او یا د مېکروبي هډوکو په ناروغۍ اخته وو، تر بشپړې درملنې او رغېدو وروسته بېرته هېواد ته راستانه او خپلو کورنیو ته وسپارل شول.
د دغو ماشومانو والدینو د خپلو ماشومانو له رغېدو او بېرته راستنېدو خوښي څرګنده کړه او د افغاني سرې میاشتې له مشرتابه او اړوندو همکارو بنسټونو څخه یې مننه وکړه، چې د دوی ماشومانو ته یې د درملنې او بېرته روغتیا موندنې زمینه برابره کړې ده.
د یادونې وړ ده، چې افغاني سره میاشت له تېرو ۳۶ کلونو راهیسې د المان د سولې کلي خیریه بنسټ له لوري د لاسلیک شوي هوکړه لیک پر بنسټ هر کال هغه ماشومان، چې په اور سخت سوځېدلي وي او یا د مېکروبي هډوکو په ناروغۍ اخته وي، د درملنې لپاره یاد هېواد ته استوي.
همدارنګه، تر دې مهاله شاوخوا ۵۰۰۰ ماشومان تر بریالۍ درملنې وروسته بېرته خپلو کورنیو ته راستانه شوي او دا بشردوستانه لړۍ لا هم دوام لري.
افغاني سره میاشت ژمنه ده، چې د خپلو بشردوستانه همکاریو له لارې به د ناروغو ماشومانو د درملنې او روغتیايي ملاتړ لړۍ دوامداره وساتي.
