د افغاني سرې میاشتې سرپرست عمومي رئيس او مرستيال يې په افغانستان کې د اسلامي همکاریو د سازمان له استازي سره وکتل!
د افغاني سرې میاشتې سرپرست عمومي رئيس او مرستيال يې په افغانستان کې د اسلامي همکاریو د سازمان له استازي سره وکتل!
نن سه شنبه د شعبان میاشتې پر ۱۹مه، د افغاني سرې میاشتې سرپرست عمومي رئيس ښاغلي شیخ الحدیث شهاب الدین دلاور او د نوموړي مرستیال ښاغلي حافظ عزیز الرحمن ددې خیریه ملي ټولنې په مرکزي دفتر کې په افغانستان کې د اسلامي همکاریو د سازمان له مسئول ښاغلي طارق علي بخیت او مل پلاوي سره د بشري مرستو د پراختیا په موخه ناسته وکړه.
ناسته کې سرپرست عمومي رئيس ددې خیریه ملي ټولنې له لوري د رواني ناروغانو د درملنې او پالنې، سوري زړه ناروغانو ، بې سرپرسته مېرمنو، پېښځپلو او اړمنو وګړو ته د ترسره کېدونکو خدماتو په هکله تفصیلي معلومات وړاندې کړل او د یادو خدماتو د پراختیا په موخه یې د یاد سازمان له استازي څخه د همکاریو غوښتنه وکړه او ډاډ یې څرګند کړ، چې د نړیوالو مرستندویه بنسټونو مرستې به په بشپړ شفافیت او امانت دارۍ تر مستحقو کورنیو رسوي.
همدا ډول ښاغلي دلاور له افغاني سرې میاشتې سره د اسلامي همکاريو د سازمان له تېرو مرستو او ملاتړ څخه مننه وکړه او د یاد سازمان مرستې یې د ناچاره او بې وسو کورنیو د لاسنيوي او ملاتړ برخه کې مهمې یادې کړې.
ورپسې په افغانستان کې د اسلامي همکاریو د سازمان استازي ښاغلي طارق علي بخیت ددې خیریه ملي ټولنې لوري په بېلابېلو برخو کې اړمنو او بې وزله کورنیو ته ترسره کېدونکي خدمات وستایل او ژمنه یې وکړه، چې له افغاني سرې میاشتې ټولنې سره به خپلو بشري مرستو ته دوام ورکوي.
