کابل؛ د افغاني سرې میاشتې او نړیوال فدراسیون ترمنځ د بشري همکاریو د پراختیا په اړه خبرې وشوې
یکشنبه، ۲۳ ربیعالأول ۱۴۴۸
د افغاني سرې میاشتې عمومي رئیس ښاغلي شیخ الحدیث شهاب الدین دلاور په مرکزي دفتر کې په افغانستان کې د ملي ټولنو د نړیوال فدراسیون له مشر ښاغلي حسام فیصل سره وکتل.
په دې کتنه کې د بشري همکاریو د پراختیا، د طبیعي پېښو پر مهال زيانمنو ته د بېړنیو مرستو د رسولو، له نړیوالو کاري شریکانو سره د همغږۍ د پیاوړتیا او د اړمنو کورنیو د ملاتړ په اړه خبرې وشوې.
ښاغلي دلاور د افغاني سرې میاشتې د بشري او روغتیايي خدمتونو په اړه معلومات وړاندې کړل او د دغو خدمتونو د لا پراختیا لپاره یې د ملي ټولنو د نړیوال فدراسیون د دوامدار ملاتړ او همکاریو پر اهمیت ټینګار وکړ.
ښاغلي حسام فیصل هم د افغاني سرې میاشتې بشري فعالیتونه وستایل او د بشري خدمتونو د لا پراختیا او اغېزمنتيا په موخه یې د لا زیاتو همکاریو او همغږۍ ډاډ ورکړ.
