پکتیا کې د ساري ناروغیو د مخنیوي لپاره د کلینیکونو د آمرینو شپږ ورځنی روزنیز ورکشاپ بشپړ شو
پنجشنبه، ۱۵ شوال ۱۴۴۷
د افغاني سرې میاشتې له لوري د سویل ختیځ ییز زون په کچه په پکتیا ولایت کې د ۵ ولایتونو د ثابتو کلینیکونو آمرینو ته د ساري ناروغیو تر عنوان لاندې شپږ ورځنی روزنیز ورکشاپ د تصدیق پاڼو په وېشلو پای ته ورسېد.
په دغه ورکشاپ کې ګډونوالو ته د ساري ناروغیو د پېژندنې، ډولونو، د انتقال څرنګوالي، د خپرېدو لارو، او د مخنیوي او وقایوي تدابیرو په اړه هر اړخیز معلومات وړاندې شول.
د یادې روزنې موخه دا وه، څو ګډونوال وکولی شي په خپلو اړوندو روغتیايي مرکزونو کې د ساري ناروغیو د کنټرول، مخنیوي او اغېزمن مدیریت په برخه کې مسلکي او معیاري خدمتونه وړاندې کړي.
افغاني سره میاشت د خپلو بشري او روغتیايي خدمتونو د پیاوړتیا په موخه په بېلابېلو ولایتونو کې په دوامداره توګه ورته روزنیز ورکشاپونه ترسره کوي، څو د روغتیايي کارکوونکو مسلکي وړتیاوې لوړې او د ټولنې په کچه د ساري ناروغیو د مخنیوي او کنټرول بهیر لا اغېزمن شي.
