کابل؛ د مالي کړنلارې او حسابدارۍ په اړه اته ورځنی ورکشاپ پیل شو
دوشنبه، ۲۰ رمضان ۱۴۴۷
د افغاني سرې میاشتې په مرکزي دفتر کې د مالي ریاست، مرکزي مرستون، پکتیا زون، مرکزي روغتون او د رواني ناروغانو د ساتنې او درملنې مرکز د عوایدو څانګې ۲۸ کارکوونکو ته د مالي کړنلارې او حسابدارۍ په اړه اته ورځنی ښوونیز ورکشاپ پیل شو.
د ورکشاپ په پرانسته کې د مالي چارو رئیس، ښاغلي حافظ شبیر احمد عثماني، دا پروګرام د کارکوونکو د علمي او مسلکي ظرفیت لوړولو لپاره یو مهم فرصت وباله. نوموړي وویل، دا ډول ښوونیز پروګرامونه د مرکز او ولایتونو په کچه د مالي چارو د تنظیم او مدیریت په برخه کې ځانګړی ارزښت لري.
هغه زیاته کړه، د مالي کارکوونکو ظرفیت لوړونه د اداري چارو د پیاوړتیا لامل ګرځي او کمزورتيا یې د ادارې پر عمومي فعالیتونو منفي اغېز کوي.
نوموړي له ګډونوالو وغوښتل، خپلې دندې په اخلاص او ژمنتیا ترسره کړي، څو اداري موخې په اغېزمن ډول ترلاسه شي. همدارنګه یې ډاډ ورکړ، چې په راتلونکي کې به د کارکوونکو د ظرفیت لوړونې لپاره نور ورته ښوونیز پروګرامونه هم تنظيم شي.
په دې ورکشاپ کې به ګډونوالو ته د مالي راپورونو د سمون، د بودیجې پر وخت او اغېزمن مصرف، د حساب ورکونې اصولو، مالي روڼتیا او د مقرراتو د رعایت په اړه اړین او تفصیلي معلومات وړاندې شي.
د يادونې وړ ده چې دغه ورکشاپ په افغانستان کې د ملي ټولنو نړیوال فدراسیون په مالي ملاتړ ترسره کېږي.
