د افغاني سرې میاشتې سرپرست رییس مولوي مطیع الحق خالص پاکستان کې د رابطة العالم الاسلامي له مشر سره لیدنه وکړه!
د افغاني سرې میاشتې سرپرست رییس مولوي مطیع الحق خالص نن د روان ۱۴۰۰ لمریز کال د لیندۍ پر ۲۳مه نېټه، چې له ۱۴۴۳/۵/۹ سپوږمیزې نېټې سره سمون خوري؛ پاکستان هېواد ته د خپل روان سفر په ترڅ کې په پاکستان کې د رابطة العالم الاسلامي او هیئة الاغاثة الاسلامي له مشر استاد سعد الحارثي سره لیدنه ترسره کړه.
په یاده لیدنه کې له افغانستان سره د رابطة العالم الاسلامي او هیئة الاغاثة الاسلامي له لوري د مرستو پر کولو خبرې او بحث وشو. په دې ناسته کې د افغاني سرې میاشتې سرپرست عمومي رییس له استاد سعد الحارثي څخه غوښتنه وکړه، چې رابطة العالم الاسلامي او هیئة الاغاثة الاسلامي دې له افغانستان سره مرسته وکړي او یادې مرستې دې د افغاني سرې میاشتې له لوري بېوزله او اړمنو افغانانو ته ورسول شي.
پاکستان کې د رابطة العالم الاسلامي مشر استاد سعد الحارثي ژمنه وکړه، چې دوی به په نېږدې راتلونکي کې افغانستان ته خپلې مرستې پیل کړي او پیل به یې هم د ملک سلمان د خیریه مرستو له رالېږلو وکړي، چې ډېر زر به یې لومړنۍ مرسته افغاني سرې میاشتې ته وسپارل شي او افغانانو ته به وویشل شي.
