د افغاني سرې میاشتې د مرکزي دفتر، زونونو او د ولايتي څانګو مسٸولينو ته روزنيز ورکشاپ پيل شو!
د افغاني سرې میاشتې د مرکزي دفتر، زونونو او د ولايتي څانګو مسٸولينو ته روزنيز ورکشاپ پيل شو!
نن يکشنبه د جمادي الآخر میاشتې پر ١٣مه، د افغاني سرې میاشتې له لوري د سازماني ظرفيت ارزونې تر عنوان لاندې پنځه ورځنى روزنيز ورکشاپ پيل شو.
د ياد ورکشاپ پرانيسته کې د افغاني سرې مياشتې سرپرست عمومي رئیس ښاغلي شيخ الحديث شهاب الدين دلاور د ورکشاپ ګډونوالو ته د ښه راغلاست او د ورکشاپ د تنظيموونکو څخه د مننې ترڅنګ افغان ولس او ملت لپاره د سرې مياشتې د کاري مسٸوليتونو او بشرپالو فعاليتونو د ارزښت په اړه هر اړخيزه او تفصيلي وينا وکړه او ياده يې کړه چې په دې خيريه، خپلواکې او ملي ټولنې هم دولت او هم ملت پوره باور لري او مونږ هر يو بايد په کامل صداقت، اخلاص او رښتينولۍ ددې ځورېدلي او درديدلي ملت خدمت وکړو، نوموړي وويل افغاني سره مياشت د قوي او غښتلي بشري ځواک په لرلو سره خپل بشرپال خدمات د هېواد په ګوټ ګوټ کې تر اړمنو، پېښځپلو او بې سرپرسته کورنيو پر وخت رسوي.
ښاغلي دلاور دا ورکشاپ د مسٸولينو ترمنځ د نظرياتو د تبادلې، د ستونزو او نيمګړتياوو د پېژندو او ستونزو ته د حل لارو د پيدا کولو غوره فرصت وګاڼه او له دوى يې غوښتنه وکړه څو له دې ورکشاپ څخه په اعظمي توګه ښه استفاده وکړي.
یاد ورکشاپ کې به د افغاني سرې مياشتې د سازماني ظرفيت ارزونې او تصديق په اړه بېلابېل خپل منځي بحثونه ترسره او د نتايجو په اړه يې لازمې پرېکړې وشي.
