بدخشان

د افغاني سرې میاشتې له لوري د بدخشان ولایت په داریم ولسوالۍ کې ۴۰۰ وچکالۍ ځپلو او اړمنو کورنیو ته د ۸ قلمه خوراکي توکو مرسته وویشل شوه. یاده مرسته کې ټولټال ۴۰ ټنه اوړه، نېږدې ۱۰ ټنه وریژې، ۴۰۰۰ لیتره غوړي، ۳۲۰۰ کیلو لوبیا، ۲ ټنه بوره، ۸۰۰ کیلو مالګه، ۴۰۰ کیلو چای او ۴۰۰ پاکټه بسکوټ شامل وو، چې هرې کورنۍ ته ۱۰۰ کیلو اوړه، ۲۴.۵ کیلو وریژې، ۱۰ لیتره غوړي، ۸ کیلو لوبیا، ۵ کیلو بوره، ۲ کیلو مالګه، ۱ کیلو چای او یو پاکټ بسکوټ وویشل شول. افغاني سرې میاشتې په روانه میاشت کې پر یاده مرسته سربېره په شهر بزرګ او شغنان ولسوالیو کې هم ۸۰۰ کورنیو ته یاده مرسته ویشلې.