کونړ کې ۶۵۰ زلزله ځپلو کورنیو سره د بېړنۍ سرپناه او توکو مرسته وشوه

پنجشنبه، ۶ جمادی الآخره ۱۴۴۷
د افغاني سرې میاشتې له لوري د کونړ ولایت په نورګل او څوکۍ ولسوالیو کې له ۶۵۰ زلزله ځپلو کورنیو سره د لنډمهالې سرپناه او د بېړنیو اړتیاوو د پوره کولو په موخه ۹ قلمه د غیر خوراکي توکو مرسته وشوه.
یاده مرسته چې د ملک سلمان د بشري مرستو مرکز له لوري چمتو شوې وه، هرې کورنۍ ته ۱ خېمه، ۵ کمپلې، ۱ د پخلنځي د توکو سیټ، ۱ پلاستیکي فرش، ۱ جارو، ۱ د اوبو ترموز، ۵ چکۍ د ځان مینځلو صابون، ۱ څراغ او ۲ د اوبو بوشکې ورکړل شوې.
د یادونې وړ ده، چې څه موده وړاندې هم په نورګل ولسوالۍ کې پر ۲۵۰ زلزله ځپلو کورنیو ورته مرسته وېشل شوې وه.