کونړ؛ ۷۰۰ زلزله ځپلې کورنۍ د څه باندې ۱۰۷ ټنه خوراکي توکو له مرستې برخمنې شوې

دوشنبه، ۱۵ رجب ۱۴۴۷
د افغاني سرې میاشتې د عمومي رئیس ښاغلي شیخ الحدیث شهاب الدین دلاور په هدایت، د کونړ ولایت د څوکۍ ولسوالۍ اړوند په بېلابېلو سیمو کې له ۷۰۰ زلزله ځپلو کورنیو سره ۱۰۷.۴۵۰ ټنه د خوراکي توکو مرسته ترسره شوه.
یاده مرسته چې د ترکیې سرې میاشتې له لوري چمتو شوې وه، هرې کورنۍ ته ۱۵۳.۵ کیلو خوراکي توکي ورکړل شول، چې اوړه، غوړي، وریژې، بوره، لوبیا، شین چای، مالګه او بیسکټ پکې شامل وو.
همدا راز، هرې کورنۍ ته یوه د روغتیا ساتنې بسته هم ورکړل شوه.
دا مرسته له یادو کورنیو سره د بېړنیو او ورځنیو اړتیاوو د پوره کولو په موخه ترسره شوه.