کابل؛ د ځوانانو او رضاکارانو د پالیسۍ وروستي کېدو او عملي کولو پر لارو چارو خبرې وشوې
دوشنبه، ۱۰ ربیعالأول ۱۴۴۸
د افغاني سرې میاشتې د ځوانانو او رضاکارانو لپاره د جوړې شوې پالیسۍ د وروستي کولو او په اغېزمن ډول عملي کولو په موخه، د دې ادارې مرستیال حافظ عزیز الرحمن او د ډنمارک سره صلیب له مرکزي دفتر څخه راغلي د ملي ټولنو د پراختیا کارپوه جېکوب ترمنځ ناسته وشوه.
په ناسته کې د ځوانانو او رضاکارانو د پیاوړتیا، د پالیسۍ د وروستي کولو او په اغېزمن ډول د پلي کېدو په اړه د دواړو لوریو ترمنځ نظرونه شریک شول.
د افغاني سرې میاشتې مرستیال د رضاکارانو د پیاوړتیا او ودې په برخه کې د ډنمارک سره صلیب له همکاریو مننه وکړه او ویې ویل، چې افغاني سره میاشت به د رضاکارانو د ظرفیت لوړونې او پیاوړتیا لپاره له ډنمارک سره صليب سره خپلو ګډو هڅو ته دوام ورکړي.
هغه همدارنګه وویل، چې د رضاکارانو د ثبت، تنظیم او معلوماتو د منظم مدیریت لپاره یو ډیټابیس جوړ شوی، چې د رضاکارانو اړوند معلومات پکې ثبتېږي.
ښاغلي جېکوب د ځوانانو او رضاکارانو د پیاوړتیا په برخه کې د افغاني سرې میاشتې هڅې وستایلې او د ګډو همکاریو پر دوام یې ټینګار وکړ.
د نوموړي په وینا، رضاکاران د ملي ټولنو لپاره د فعاليت پرمهال يو قوي بشري ځواک ګڼل کېږي. هغه زیاته کړه، چې د پالیسۍ عملي کول وخت، سرچینو او دوامدارو هڅو ته اړتیا لري او باید د پالیسۍ د جوړولو او تطبیق پر مهال نړیوال معیارونه او د هېواد ټولنیز شرایط په پام کې ونیول شي.
د ناستې په پای کې دواړو لوریو د ځوانانو او رضاکارانو د پیاوړتیا، د پالیسۍ د وروستي کولو او په اغېزمن ډول پلي کېدو لپاره د ګډو همکاریو پر دوام ټینګار وکړ.
